|
WILLEMSTAD -
Preparashonnan pa
karnaval 2005 a ranka sali! E aña aki un tiki mas
tempran ku loke nos ta kustumbrá pasobra e aña aki
karnaval ta kai mas tempran ku nòrmal. P’e motibu
aki tambe, FOKA, Fundashon pa Organisashon di
Karnaval, a kuminsá ku su proyekto di
dranghekken.
E
último 2 añanan esaki a resultá di ta un éksito
kompletu. Hopi empresario i amigunan di karnaval a
sostené FOKA dor di partisipá ku un òf mas bòrchi
di propaganda. Ku esaki ta yuda organisá un
karnaval festivo i ademas probechá un oportunidat
úniko pa hasi propaganda, menshoná un produkto ku
bo ke promové o djis duna un bunita mensahe riba
parti di e ruta di karnaval (3800 meter).
Pa medio di e komunikado di prensa
aki nos ke poné bo na altura ku e kampaña ta den
full swing i e ta sera 17 di yanüari 2005. Preis
pa bòrchi ta Naf. 200,-- di kua Naf. 100,-- ta pa
traha (inkl. palu, diseño i dekorashon) e bòrchi i
e sobrá Naf. 100,-- ta un kontribushon na FOKA.
FOKA ta uza e kontribushon menshoná akí pa
mantenshon i kolokashon dje hèkinan i e bòrchinan
di propaganda. E kampaña aki ta bálido pa un aña,
karnaval 2005.
Despues di karnaval nos ta entregá tur bòrchi na
nan respektivo negoshinan. Dje forma ei, si e doño
ta deseá esaki, e por sigui uza su bòrchi di
propaganda ku el a spònser. Si aña pasá bo tabata
un dje partisipantenan den e proyekto aki i bo
bòrchi ainda ta den bon kondishon, bo por skohe pa
bolbe uza e bòrchi pa solamente Naf. 100,-- na
lugá di Naf. 200,--.
Ponementu dje hèkinan di protekshon
aki ta un dje kondishonnan ku Kuerpo Polisial a
pone pa nan por mantené òrdu mihó.
Dor di kumpra un òf mas dje
bòrchinan, bo ta yuda FOKA realisá e proyekto di
seguridat asina nesesario aki i ademas bo ta hasi
promoshon pa e produkto o servisio ku bo ta skohe,
den e periodo di marchanan di karnaval (kasi dos
siman).
Nos
ta hasi un apelashon riba bo kompania pa duna bo
kontribushon na komunidat dor di kumpra bo bòrchi
pa asina nos tur por disfrutá mas ainda di un
bunita karnaval 2005! Por haña tur informashon
relashoná ku bòrchi i kon pa partisipá den e
proyekto aki serka Rica (698 0952) òf Yeo (524
1641). |
